中環出更：林健鋒西藏抖完暑 醉氧大覺瞓
西藏係唔少香港人慕名想去嘅旅遊熱點之一，行政會議成員兼立法會議員林健鋒（Jeffrey）就趁住立法會抖暑期間，去咗西藏拉薩同林芝玩，仲喺Facebook大晒靚相。Jeffrey都成六十六歲，去海拔咁高嘅地方，身體頂唔頂得住o架？佢就話唔少朋友都關心佢有冇高山反應，事關佢經常做運動，會較普通人需要更多氧氣，不過Jeffrey完全冇問題，只係返香港後出現「醉氧」，要瞓番一大餐先得囉！
所謂「醉氧」係指人由氧氣含量低嘅地區返到氧氣含量高嘅地區之後，出現包括嗜睡、疲倦嘅不適情況。不過見到Jeffrey仲可以喺Facebook貼相同埋留言，證明佢平安無事喇！
大讚拉薩林芝「美麗淨土」
今次係佢第一次去拉薩同林芝，大讚當地自然風光得天獨厚，係難得嘅美麗淨土。佢仲喺西藏嘅著名建築布達拉宮前影相打卡，形容自己係遊歷高原上嘅奇異仙境！Jeffrey仲話，遲啲再有多啲鐵路通車之後，去西藏就會更加便捷，唔知佢係咪意猶未盡，已經諗住再去多次呢？
卓妮