中環出更：貝鈞奇撐香港足球 憶為睇波爬山
依家本地波入場觀眾少咗好多，但以前喺香港睇本地波，就一票難求。香港足球總會副主席貝鈞奇話，以前如果要睇大型賽事，買唔到飛都要爬山睇。佢話大球場附近斜坡有大石，以前叫「旺丁場」嘅花墟後面就有個高位睇波。睇嚟要睇波都要身手敏捷喎！
貝鈞奇話，依家本地波嘅賽事少人睇，甚至試過只得兩、三百名觀眾，令到好多香港球員都睇唔到前景，唔少人選擇去國內參賽。佢話如果喺足球隊搞明星化可以成功就當然好，但因為工資低、球員唔積極，唔想以此為終身職業，令到香港搵唔到球星，導致香港足球嘅水平難以提升。
張寬年現只可踢「半場」
呢一日活動係北京及香港青年足球隊往冰島培訓嘅授旗儀式，籌委之一張寬年話，自己最後一次踢波已經係大學時代，依家只可以踢「半場」，唔係講半場比賽，係半個足球場咁話！香港北京交流協進會會長施榮懷就話，細個同小學同學都有踢波，但係已經廿年冇踢，幾年前個仔嘅球隊叫佢去踢吓，佢都有去。佢又提到以前好多人睇波，兩萬八千個位都滿晒，佢仲試過爬上南華會對住大球場嘅鐵絲網睇波添！
今次活動搞手之一嘅律師陳清霞話，去年活動係以教練為主，今次就轉為本地青年同教練，資助佢哋同北京青年足球隊到冰島集訓及進行三角賽。懲教署前署長單日堅就認為，應該令球員有多啲出路，仲話球員都有唔少粉絲，政黨可以考慮吸納佢哋喎！
卓妮