政情：劉江華 李美嫦 玩硬地滾球好失威
康樂及文化事務署定咗每年八月第一個星期日係「全民運動日」，開放晒轄下嘅康體設施畀市民用，唔經唔覺今年已經係第十年喇！民政事務局局長劉江華、康文署署長李美嫦尋日都有出席葵青區「全民運動日」活動，佢哋唔單止係睇市民做，亦都有親身落場做健體操，眼見劉、李拎住兩個啞鈴都做得咁輕鬆，唔通佢哋平時都有操開？
劉、李之後仲同傷殘運動員一齊玩硬地滾球，玩法好簡單，只要將自己個波碌到最接近白波就謂之贏。不過呢部分劉、李顯然唔係好在行喇，一開始佢哋每人碌咗一球都唔係太接近，兩位傷殘運動員一出手都比佢哋更接近白波，劉、李眼見傷殘運動員係用上手拋個波出去，而唔係用下手碌，於是有樣學樣，點知一拋就大力得滯，結果仲遠過第一球啊！睇嚟劉、李下次要花多啲時間練習，咁就唔使咁失威喇！