政情：雷兆光忙搞特技創作公司
香港人愈來愈長壽，好多人都選擇退而不休。九巴後人雷兆光已經退休一年，冇再打理九巴業務，不過佢仲忙過退休前。究竟佢忙緊乜？咪就係佢新開嘅特技創作公司囉。
相比做九巴壓力細咗
雷兆光早喺退休之前已經有計劃開一間特技創作公司，退休之後就直接投身新公司業務。對於本身專長係特技創作嘅佢嚟講，直情係「開番自己嗰範」，做番佢擅長嘅嘢。不過佢就話，依家自己開公司就犧牲咗屋企人，因為佢太太同個女去咗美國暫住，得番佢同個仔喺香港，加上佢手頭上都有幾份工作做緊，都行唔開去美國陪老婆。但佢直言，同做九巴嘅時候相比，依家壓力細咗，成個人都開心咗咁話。
講起依家唔少商業機構都有開發手機應用程式（App），九巴個應用程式雷兆光都有份落手落腳搞。佢就話，整個應用程式真係一啲都唔簡單，因為佢有相關專長，所以當初都有參與。不過就算有乜問題都冇得搵佢投訴，事關佢退咗休，所以唔係佢負責喇喎。