中環出更：鬧容海恩放產假係咪歧視 考起陳章明
今個星期五出嫁嘅立法會議員容海恩，盛傳係奉子成婚，可能成為首名喺任期內懷孕及產子嘅議員。不過，有網民話容屆時或者要放產假，恐怕影響議員工作，批評佢不作「安全性行為直至任期完結」，係「以個人歡愉凌駕社會利益」；但係亦有人認為網民嘅言論係嚴重歧視女性，話會搵平等機會委員會（平機會）跟進。到底有關言論係咪涉及歧視呢？平機會主席陳章明都承認被考起！
暫時睇唔到立案理據
陳話，平機會若要就歧視立案調查，須涉及教育、服務及就業三個範疇，但佢認為網民對容海恩嘅言論並未涉及呢三個範疇，所以暫時睇唔到立案理據。佢話明白網民對議員懷孕有機會影響工作而不滿，亦理解部分人對網民言論覺得反感，但認為較好做法係立法會秘書處向公眾解釋議員支薪嘅理據，而網民言論係咪應該被視為歧視，亦值得市民探討。
另外，陳尋日出席九龍青年商會有關「顏損」者被歧視嘅活動，佢坦言低估社會「以貌取人」嘅情況，強調僱主如果因員工容貌而「炒人」，將觸犯《殘疾歧視條例》，強調容貌係同工作能力無關。
卓妮