政情：田北辰BB 新選區爭插旗 寸民記大蝦細
選舉管理委員會公布咗區議會選舉選區劃界建議，各大黨派開始為明年區議會選舉籌謀。民建聯（民記）中人透露，立法會議員田北辰（田二少）牽頭嘅實政圓桌，同民記喺多個新選區都出現「撞區」情況，包括民記「雙料議員」梁志祥所屬嘅元朗同屯門嘅多個新選區，又批評實政圓桌唔「打招呼」就派人落區做地區服務，咁做同對手（民主派）冇分別。田二少就大呼有關批評對佢哋唔公道，仲反駁話民記同實政圓桌係「一個大人一個BB仔，BB仔要飲奶多啲」喎。
根據選管會最新選區劃界建議，全港十八個區議會將新增二十一個選區。身兼民記屯門支部主席嘅屯門區議員葉文斌話，今次區議會選區劃界中，屯門新增兩席，其中欣田一席民記有計劃派社區主任賴嘉汶參選，實政圓桌就疑派社區幹事黃梓雋。喺另一新選區掃管芴，民記亦早已有成員喺當區做地區工作，但實政圓桌潘冰婉近一個月突然落區。而元朗、荃灣亦都出現兩政團「撞區」情況。葉質疑實政圓桌「唔傾唔講就放人做服務」，同對手冇分別。
另外，有民記高層就認為，雖然同實政圓桌係有「撞區」，但對方人選以新人居多，冇乜社區經驗，分分鐘只係做炮灰。但係始終唔想出現自己人撼自己人，否則萬一搞到「雙失」，只會令反對派得益，故此佢哋都希望可以同田二少溝通吓，但有人似乎唔係好想協調咁話。
建制唔協調好 隨時益泛民
田二少接受查詢時就大呻民記講法唔公道，事關對方有一百多個區議員，實政圓桌只得七個，「我哋發育緊，一個大人一個BB仔，BB仔要飲奶多啲」，似係暗示民記「大蝦細」。對於不願協調嘅指控，佢就話為咗唔傷和氣，佢哋唔會喺舊有選區同建制派對撼，新界西新增選區先係佢哋主力搶攻嘅，認為新選區唔存在要「打招呼」，仲話「廿一個新區，我哋想去五個啫，恰如其分啦！」
新增嘅選區勢必引起民主派同建制一輪爭奪戰，不過喺兩大陣營對壘前，建制派協調已率先出現問題，如果傾唔掂數，真係分分鐘畀民主派漁人得利喇。