中環出更：容海恩出嫁麥美娟找數做姊妹
新民黨立法會議員容海恩（Eunice）與該黨政策總裁袁彌昌將於月內結婚，可靠消息指女方已懷孕，可謂好事成雙。究竟Eunice會搵邊個做姊妹，陪佢出嫁？原來就係曾經話過Eunice拍拖會幫手做掩護，同埋出嫁時要做姊妹嘅工聯會議員麥美娟（Alice）喇！不過，Alice就唔肯透露Eunice嘅大日子，話要留番畀女主角公布喎。
Alice話成日出席活動時都見到Eunice，仲笑Eunice會唔會冇時間拍拖，估唔到咁快就出嫁。咁知唔知Eunice係「好事成雙」，Alice就笑笑口話只知道係好事。對於新民黨主席葉劉淑儀話該黨桃花旺盛，仲邀請單身嘅Alice加盟，Alice就話工聯會都撮合好多情侶，相信「唔關黨事關人事」喎。
立法會議員冇產假
至於舊年八月曾同Eunice、袁彌昌一齊食飯嘅工聯會立法會前議員鄧家彪（阿彪）就話，當時食飯已覺得佢哋眉來眼去。舊年年尾有日約咗Eunice晨咁早去水泉澳傾地區問題，袁竟有現身，就覺得佢哋已係「超越同事嘅關係」。佢又話知道袁作為才子喺大學好受歡迎，望袁婚後「穩定啲」，專心寫多啲好文章。問到覺唔覺得Eunice婚後可能專注照顧家庭，未必角逐連任時，阿彪就話相信Eunice可以家庭事業兩得意，在職婦女最重要都係有支持自己嘅伴侶咁話。
Eunice將會係立法會首位在任產子嘅議員，秘書處話立法會議員酬金同津貼制度並唔包括分娩假期或待產假期嘅。但咁啱得咁蹺，議員蔣麗芸尋日同特首會面時就重提「嬰兒基金」，佢話目前唔少年輕人就算結咗婚，都要認真考慮生唔生細路仔，叫政府趁依家財政盈餘健康時倣效新加坡，整個「生仔利是」，等下一代喺升學、置業有啲資助，咁先鼓勵到年輕人生育，唔知Eunice有冇機會受惠呢？
卓妮