政情：成都新興泰式火鍋嗜辣林青好欣賞
好多人都無辣不歡，香港廣州社團總會對外事務委員會副會長林青（Erica）都係其中一個，最近佢密密去麻辣火鍋嘅故鄉成都公幹，梗係趁機大快朵頤。Erica發現當地最近流行食以冬蔭功作湯底嘅泰式火鍋，酸酸辣辣好惹味，仲好欣賞成都人嘅創意添！
Erica早前陪老公唐卓敏醫生到成都開會，加上做美容生意嘅佢喺成都有投資項目傾緊，所以最近經常去。佢笑稱當地依家最火紅嘅店就係泰式火鍋，排隊要排近兩個鐘o架！不過泰式火鍋除咗冬蔭功湯底同泰式醬汁唔同之外，食材同食法都同中國火鍋一樣。
日本地獄拉麵係極限
講開食辣嘢，Erica都算係高手，好似香港開到成行成市嘅酸辣米線，佢食嘅辣度係勁辣，對福建籍嘅人嚟講都算厲害。雖然咁食得辣，但係都有極限嘅，早幾年試過挑戰日本地獄拉麵，試咗地獄級嘅辣度之後，就唔再食啦！
佢仲笑笑口話早年未識老公唐卓敏之前，有馬來西亞朋友知道佢咁鍾意食辣嘢，就叫佢嫁去大馬，因為當地有好多好味嘅辣嘢食喎。