政情：莫錦貴怕甩轆 提早綵排拜車公
今年農曆大年初二時，鄉議局同沙田鄉事委員會按慣例往沙田車公廟為香港同沙田求籤，但當時就疑似甩轆將兩支靈籤掉轉，惹來外界質疑。上周三、即農曆六月初六，沙田鄉委會主席莫錦貴就拉大隊再拜車公，莫非為年初甩轆補鑊，想心安啲？
年初疑掉轉靈籤 覺得有啟示
莫錦貴話，拜咗車公幾十年未遇過疑掉轉靈籤嘅事，所以覺得好似有所啟示，提醒要做好拜車公嘅程序，於是就趁六月初六車公寶誕去拜車公，並當做拜神操練。今次佢仲搵咗蓬瀛仙館人員到場幫手，預告雙方日後會繼續合作，包括未來年初二嘅求籤活動。佢仲話，之後會再同鄉委會開會檢討，研究日後會否採用呢個拜神模式。
不過，今年初二只係發生疑似掉轉靈籤事件，拜神方面唔覺有問題喎，點解要做拜神操練呢？莫錦貴就力撐今年求籤過程冇問題，只要仔細同小心啲就可以避免混亂情況，所以就唔使檢討同操練求籤環節喎。既然如此，咁希望明年初二求籤順順利利啦！