政情：AI都無符 林超英變馬蹄
依家手機應用程式（Apps）愈出愈多，不知幾多花臣，就連天文台前台長林超英都喺Facebook講起呢件事，唔通佢都迷上咗？佢仲喺Fb上載咗張照片，話自己變咗「馬蹄」添！點解？原來同AI（人工智能）有關嘅！
話辨認App被惡搞
林喺Fb貼文話，潮流迷信Apps，又迷信AI，以為乜嘢問題都可以喺電話借用呢兩樣嘢解決。其實AI只係喺發展初階，如果以機器扮人，得出嘅結果可以錯得好緊要。有人就用咗佢嘅頭像去問某植物辨認App，結果答案係「荸薺」，即係馬蹄。佢話個App畀人惡搞，但AI就一啲辦法都冇。
呢個貼文一出，有網友話「不是AI沒辦法，是人沒辦法」，林就回覆話係胡鬧嘅人恰AI。亦有網友叫佢做「馬蹄教授」，仲有網友笑稱「或者套AI已經進步到懂得幽人一默，於是乎你係馬蹄，佢係一碌蔗」。