政情：緬甸戶外用餐 陳智思同烏蠅爭食
近年唔少港商遠赴緬甸尋找發展機遇，行政會議召集人陳智思則早着先機，一九九○年就投資仰光嘅酒店項目，儘管當時仰光較為落後，商業競爭唔大，但係佢就要面對同烏蠅「爭食」嘅煩惱。
陳智思尋日喺一個青年活動講起，某日喺仰光開完會後到戶外用餐，當侍應捧餐而至，密密麻麻數以百計嘅烏蠅早已湧現，就算侍應點趕，菜式都係烏蠅食先，為咗尊重當地人嘅心意，惟有勉强食幾啖啦。
搭火車去嘉峪關 去唔到餐卡
陳智思又話，一九九二年曾經隨考察團到訪新疆，並由烏魯木齊搭長途火車往嘉峪關，期間佢打算到餐卡用膳，點知客卡同餐卡之間，竟然係放滿牲口嘅貨卡，根本無法穿越，結果整個車程，陳智思都無啖好食。佢又話，依家緬甸同新疆已經改變咗好多，但係去落後地區認識下異邦文化，都係一個擴闊眼界嘅好機會。