政情:憶議員生涯 梁智鴻自嘲離地

有「金刀梁」稱號嘅泌尿科名醫、前行政會議成員梁智鴻最近出咗一本書《理性的呼喚—從手術室到社會大舞台》,細數佢由八十年代開始參與各種公職的經歷,包括立法局議員、醫管局主席、香港大學校務委員會主席等。講起做議員生涯,金刀梁笑稱自己當時都幾離地,點解呢?

以為只服務醫生

事關當年金刀梁參選醫學界功能界別,第一次參選時輸咗,因為佢係專科醫生,唔知普通科醫生需要乜嘢。後來第二次參選,大比數贏咗進入議會,當佢入到議會又以為服務對象只係醫生,後來先知議員係要為市民服務,所以笑言自己都幾離地。

金刀梁其後提到,有人認為功能界別係小圈子選舉,應該廢除,佢承認功能界別確實係小圈子選舉,但議員推動嘅政策都係為香港整體着想,市民都得益。

講番今次新書有中、英文兩個版本,金刀梁話英文版係自己親手寫,不過中文版就由出版社翻譯,因為佢中文水平係九流,連講都講唔掂喎!

第一手消息請下載on.cc東網iPhone/iPad/Android/Windows Phone Apps