中環出更：夾一次即演出 葉建源未驚過
臨近立法會會期尾聲，代表立法會今個年度最後一場音樂會即將舉行。教育界議員葉建源以前都試過喺音樂會上打鼓，今次佢亦再接再厲參與演出。早前仲喺Facebook上載綵排時嘅相，佢話到時會同醫學界議員陳沛然（Pierre）一齊打，不過講明自己冇咩時間練，所以上次演出完之後都放低咗，冇再練習，到咗今次演出先再練習番，希望有啲進步啦！
葉建源仲話，張相係唯一一次有議員參與嘅綵排，夾一次就要演出。練得咁少，夠唔夠o架？葉就話完全唔擔心，仲話練習過程非常順利，完全冇「蝦碌」，而且演出最重要係大家開心，所以唔使太大壓力嘅！
陳維安唱懷舊金曲
根據立法會文件所示，除咗葉同Pierre之外，工程界議員盧偉國都會演出，另外前高官蕭炯柱就擔任指揮，立法會秘書長陳維安亦會開金口獻唱懷舊金曲。不過睇番張綵排合照，仲見到議員陳淑莊同范國威喎，唔知佢哋到時表演咩呢？葉就笑笑口賣關子，話到時嚟音樂會睇佢哋表演咪知囉！
卓妮