香港雖然位列全球十大最富有城市第八位，不過只係得個外殼呃到人，事實上喺呢個富人嘅天堂、窮人嘅地獄裏面，仍然仲有清貧學生每日過住同內地山區貧困兒童差唔多嘅坎坷生活，令人O嘴。雖然特首林鄭月娥口口聲聲話要改善民生，又話要喺教育上做嘢，但事實證明港府一路都係「講人自講，呃人咁呃」嘅咋。
呢，再過幾日就係升中放榜大日子，本報採訪咗一對辛勤苦讀嘅小姊弟，喺佢哋身上就睇到香港教育制度嘅大細超同窮人嘅悽慘嘞。呢對來港兩年讀緊小六嘅姊弟，唔止一家四口屈喺大埔山頭一間細小寮屋居住，多蛇蟲鼠蟻、屋企成日漏水唔在講，更惡劣嘅係兩姊弟每日要走過以木梯搭成嘅崎嶇山路，花粒半鐘先可以由大埔去黃大仙返學，放學仲要幫屋企執柴煲水煮飯。難得呢對小姊弟冇放棄自己，唔止返學永冇遲到，學業成績仲名列前茅，仲好生性咁話希望放榜入到心儀中學，報答屋企，真正人窮志不窮呀。
話時話，窮人想脫貧，透過讀書升學爭取高學歷，可以話係唯一希望。不過香港教育制度嚴重不公，愈來愈貴族化同以錢銀掛帥，有錢人子女可以喺教育上有更多選擇，可以報讀國際學校，或者吼實直資名校選擇校網，就算學費乸脷到每年逾二十萬元都負擔得起，幫仔女贏在起跑線。反觀清貧子弟就冇呢支歌唱咯，只能成為港府制度不公下嘅犧牲品，喺港產庸官主政下，「窮二代」無法以知識改變命運，扭轉家貧，間接令跨代貧窮嘅社會死結延續，注定「窮，你就輸一世」。孔夫子講嘅「有教無類」，喺香港早成絕唱咯！
咁都未算，主管教育政策嘅庸官多年來將本地家長同學生當「白老鼠」，教育政策朝令夕改，母語教學、語言微調、TSA，不一而足，令人無所適從。偏偏「求學不是求分數」只係口號，實際上學生升學仍然以分數為依歸，甚至連幼稚園都出現操練文化，引致有學生抵受唔住壓力自尋短見，理應責無旁貸嘅教育局唔止冇正視，仲反而話學生「有啲唔舒服嘅嘢就頂唔順」，嗰副涼薄嘴臉先至最令人頂唔順囉。
都係嗰句喇，林鄭話要改善教育，上任初期就推出涉及三十六億元嘅優質教育措施，仲話財政預算案向教育增撥二十億元經常性開支，係威係勢咁款，實則咪又係見唔到成效。計功夫茶話齋，林鄭講乜都假，改革教育只需強制班高官將子女留港升學，唔好一味放洋海外，仲要留喺官津學校就讀，咁呢班庸官唔想害咗自己下一代，就會自動自覺認真搞好香港嘅教育制度嘞！