政情：公民講場：黃錦星扮闊佬派錢 小恩小惠 轉手益兩電

行政會議早前批准兩間電力公司發展新計劃，兩電將分別於十月同明年一月加電費。政府宣布向立法會申請八十七億，以向每戶提供三千蚊補貼，分六十個月發放，即每戶每月獲補貼五十蚊。對於兩電加價後市民負擔嘅電費而言，五十蚊真係小恩小惠，難為環境局局長黃錦星尋日仲講得出口，話補貼係照顧基層同長者嘅紓困措施，話公帑係落入市民個袋。如果兩電唔發展新計劃，唔獲批准加價，政府又何需補貼市民呢？依家透過市民將八十七億袋落兩電個袋至真。