政情：融入當地文化 戴麟教學生追女仔
香港青年工業家協會今年繼續同職業訓練局合作搞體驗計劃，畀大專生去內地實習三星期。協會副會長戴麟就喺計劃啟動禮上過幾招畀學生，其中一招竟然係叫佢哋追女仔，究竟搞乜鬼？其實佢係想叫學生認識同融入當地文化，而最直接嘅方法就係追女仔喇。不過佢之後都話，咁教學生唔太啱，又講笑話係自己唔夠吸引，先要主動追女仔喎。
講完笑，戴麟之後都有正經教學生心得，就係要摸索，又話如果事事安排妥當，學生就會錯失學習機會，亦都唔覺得係要珍惜，所以實習計劃嘅第一日行程都會「折磨」吓啲學生。佢又認為，雖然現時資訊發達，但學生始終要親身體驗先最有效，上網只可作為輔助工具。
設計創新衣架 諗到頭都爆
本身生產衣架嘅佢經常要諗點創新，直言諗到頭都爆，因為唔同用途嘅衣架喺設計上都好大分別。而近來爆發貿易戰，唔少製衣廠都將生產基地遷往東南亞國家，佢就話業務都難免受到影響喎。