政情：借咗聾耳陳隻耳？莫乃光突發性失聰
民主派會議召集人、資訊科技界立法會議員莫乃光（Charles）自上星期三起，右耳突發性失聰。Charles尋日如常出席立法會財務委員會會議，當我哋向佢了解失聰情況時，佢就以左耳靠近，仲話「我呢邊面靚仔啲」，而佢接受診治後，正服用藥物，情況有好轉，希望可盡快康復。佢又話，右耳唔係完全聽唔到，但聆聽時有雜音，唔係太清楚。
Charles引述醫生話，係細菌、血管及免疫系統問題導致右耳失聰，醫生曾建議佢入院吊針以改善情況。Charles尋日一踏入會議室，已引起民主派議員起哄，人人都關心佢嘅病情。本身係醫生嘅郭家麒仲戲稱：「你借咗聾耳陳隻耳呀？」及後又為Charles「診症」，話可以唔使入院，準時服藥再睇情況如何喎。
問卷保安事故 向市民道歉
另一方面，Charles又發出新聞稿向市民致歉，話說其辦事處早前使用Typeform提供嘅網上問卷調查工具，因Typeform近日發現資訊保安事故，令早前曾參與一人一信反對縮短選舉投票時間嘅市民受影響，Charles就此向受影響市民衷心致歉。