中環出更：驚植物油唔健康 孫蔡吐媚豬油炒餸
仁濟醫院早前舉行「一個世紀的約會」晚宴，與百歲長者共度歡宴。想長命百歲梗係先要健康，不過當晚最年長嘅一百一十四歲麥婆婆分享長壽之道時就話，秘訣係經常食肥豬肉，同埋加啲沙糖喺鹹魚度食喎。仁濟總理孫蔡吐媚（Mary）就好認同，仲自爆會買肥豬肉返屋企煎油出嚟炒餸添。
當大家以為麥婆婆應該係講笑，在場嘅Mary就好認同，仲笑笑口話佢依家都已經食番豬油，事關近年有外國研究顯示，花生及粟米等植物油比豬油更唔健康，為被誤會咗半世紀嘅豬油大平反。Mary覺得都頗有道理，所以間唔中都會買肥豬肉返屋企，煎啲油出嚟炒餸，或者淋幾滴喺白灼嘅青菜上面，笑言食咗兩、三年感覺都唔錯，形容係自己嘅秘密喎。
郭慧賢夜跑怕曬黑
仁濟主席馮卓能聽完勁開心，因為佢鍾意食乾炒牛河，自知好唔健康，不過依家就唔怕食喇。佢太太郭慧賢就話，香港人真係好長壽，佢都經常打波、跑步，保持身體健康，以前朝早送咗小朋友返學後會喺街邊跑步，但夏天嘅陽光太勁，怕曬黑，最近就改為夜跑。
社會福利署助理署長陳德義、仁濟行政總裁梁偉光（Jason）及社會服務部總經理蘇天祐都有到場，三人傾得好開心。Jason話，以前曾經到私人安老院探望親戚，覺得環境認真麻麻，不過到仁濟工作之後，對安老院印象大為改觀，形容仁濟轄下嘅安老院日日喺布告板更新豐富節目，院友好似坐郵輪咁開心，而日間長者中心就似會所，一班老友記一齊玩，仲好過請幾個工人姐姐喺屋企服侍咁話。
卓妮