政情：為寫香港醫療史 唐卓敏買舊相
香港收藏家協會會長唐卓敏（William）嘅收藏興趣多多，其中以稅票、地圖等紙張為主。最近佢又有斬獲，喺拍賣會上買咗兩張一八九四年嘅香港舊相，鏡頭下，啲死屍正喺碼頭用棺材運走。本身係醫生嘅William就解釋，當時香港爆發鼠疫，死咗好多人。佢打算寫一本有關香港醫療史嘅書，所以正收集呢啲珍貴嘅相片。一張相，勝過千言萬語。
話收藏最緊要公諸同好
有啲收藏家買咗好嘢就收收埋埋自己欣賞，William就有唔同睇法。佢認為，收藏最緊要係公諸同好，如果收收埋埋就等於消失咗，所以要諗辦法令收藏品發揚光大，先至係一個真正嘅收藏家喎。佢有時會捐畀博物館，亦會透過寫書同大家分享，至今已寫過幾本書喇。
最近嘅一本書係講日戰，大受歡迎。事關本書文字唔多，但係有大量珍貴相片同埋插圖，重現當年三年零八個月嘅百姓生活，例如點樣煮樹皮，難怪出版後咁多人鍾意啦。