政情：徒弟退出街工 眾叛親離阿忠
近年不斷被炮轟做「逃兵」嘅立法會議員梁耀忠（阿忠）醜聞纏身，其領導嘅街坊工友服務處（街工）早前更大地震爆退黨潮。最新消息，外界視為阿忠徒弟及接棒人嘅葵青區議員黃潤達已申請退會，並由今日起正式離開街工。
二○一六年立法會換屆選舉，阿忠由老巢新界西轉戰俗稱「超級議席」嘅區議會（二）功能界別選舉，派黃潤達單挑新界西直選卻落敗，未有成功交棒或擴大版圖。立法會換屆後爆出「逃兵」事件，令阿忠形象插水，去年更有指佢想「翻兜」，重返新界西參選，惹來黨內不滿，包括有傳黃潤達炮轟阿忠「永續參選」，率先有會員退會，令街工五名區議員減至三人。
有傳勞工組風波令二人反面
近月阿忠聲稱街工財赤，疑要解僱勞工組三人，再爆退黨潮。阿忠仲金句連連，被指要求三人做義工，當追問是否解僱勞工組就話「打簿你咪知囉」。三人組之一，譚亮英回覆查詢時確認尋日仲有糧出。不過，有知情人士透露，黃潤達因解散勞工組事件，同阿忠反面，師徒情不再，決心離開街工。
上周阿忠接受前立法會議員劉慧卿訪問時，就話做「逃兵」係迫不得已，又話願意留喺街工嘅會員「都係支持我嘅」，但否認係「一人專政」。被問到交棒工作，阿忠就話上屆已有做，但黃潤達係「初生之犢」輸都冇計，又話可以都想幫手抬轎。
阿忠嘅言論隨即引起街工內部極為不滿，繼而傳出黃潤達已退黨，幾經追問後，街工會員又口徑一致，話黃仲喺街工會員群組內。據了解，勞工組風波實乃派系鬥爭，勞工組屬黨內激進派，不滿阿忠喺議會內和理非非嘅處事方式，所以有指阿忠欲「借刀殺人」。
被問到黃潤達是否退黨，阿忠笑一笑，稱問其本人，不作回應。相反黃接受查詢時，就確認已冇交新一期年費，且一早交咗退會申請，今日重返自由身。咁係咪同阿忠不和？黃就強調，不評論退黨原因。街工規模本身已較其他工人組織細，過去又不盡力於發展同培養新生代，今次連唯一「潛力股」黃潤達都走埋，唔通自此正式步向阿忠專政？