啟德郵輪碼頭公共交通嚴重不足，營運多年嚟已經喺海外遊客心中留下惡劣印象。城巴喺日前開通一條廿二號新巴士線，來往九龍塘至啟德郵輪碼頭，原本係為咗完善碼頭嘅對外交通，豈料當日清晨五時四十五分由九龍塘開出頭班車，駛到碼頭門口竟食閉門羹，被保安阻止駛入碼頭，乘客要喺碼頭外落車，原來係碼頭營運時間未到。雖然啟德郵輪碼頭方面承認係溝通不足所致，但實在好難令人接受，旅遊事務專員黃智祖今年二月先至由政府新聞處處長調任過嚟，唔知佢係咪仲未瞓醒呢？
