政情：郭榮鏗亂追問 被轟「乜都唔識」
香港律師會早前提出增設非強制性執業試「Law Society Examination」（LSE）惹起爭議。立法會司法及法律事務委員會尋日開會討論「香港的法律教育及培訓」時，公民黨（公文袋）法律界立法會議員郭榮鏗就追問律師會前會長熊運信，要求就舉辦LSE提供更多理據，話自己代表法律界要了解更多喎。不過，本身係律師嘅議員謝偉俊（Paul）就鬧爆郭榮鏗好似乜都唔知，「你係唔係代表我哋業界嘅呢？」
郭榮鏗一再追問，律師會會預幾多人去考LSE，熊運信就強調，只係想畀機會一啲考唔到院校課程嘅人，但就冇預畀幾多人考。當兩人你一言我一語時，委員會主席梁美芬就出聲「教訓」，要跟規矩等主席叫先可以答，唔好一人一句，熊運信就立刻向梁美芬道歉。
謝偉俊暗寸郭唔守規矩
到Paul發言時就加碼潤郭榮鏗，話立法會應該係守規矩嘅地方，可惜依家冇一個好好嘅示範，經常有疊聲出現。佢又話，以前都做過功能組別議員，理應要認識「米飯班主」嘅想法，唔明點解郭榮鏗乜都要問番熊運信，覺得好奇怪。