政情：沙中線事故頻生 黃唯銘做埋工程師學會會長
港鐵沙中線近日醜聞不斷，搞到唔少高層頻頻出嚟為工程問題解畫，港鐵工程總監黃唯銘就係其中一人。不過唔好以為黃唯銘為咗補鑊忙到踢晒腳，喺港鐵正處於多事之秋之際，香港工程師學會尋日宣布，黃唯銘接任新一屆會長，仲要已經喺上周四（21日）已正式上任。唔通連串嘅工程問題喺黃唯銘眼中都係「濕濕碎」，所以仲可以抽時間做多項公職？
負責沙中線工程近7年
睇番港鐵嘅資料，黃唯銘喺一一年底加入港鐵，擔任沙中線總經理，仲喺一四年獲委任為工程總監同執行總監會成員，即係話，佢負責沙中線工程近七年，理應好多嘢都喺佢掌握之中。不過沙中線依然千瘡百孔，黃唯銘喺呢個時刻分身去做工程師學會揸弗人，唔知笑唔笑得出呢？