政情：阿忠屢做逃兵卿姐狂炳「檢討吓！」
街坊工友服務處立法會議員梁耀忠（阿忠）自今屆上任後，多次做「逃兵」遭到各界猛烈抨擊，而且仲爆出勞工組「糾紛」，可謂醜事一件接一件。阿忠尋日接受立法會前議員劉慧卿（卿姐）訪問時，再度就「逃兵」解畫，話做主席冇得發言，所以有得揀都唔會做。卿姐聽到都無名火起，狂炳阿忠，「細佬，你返去檢討吓喇！」
作為立法會最資深嘅議員，阿忠要負責主持換屆後首個會議選主席，不過佢臨陣退縮做「逃兵」，令民主派同支持者都怨聲載道。卿姐問點解要搞到「滿城風雨」後走咗去，阿忠話當時唔接受被指擁雙重國籍嘅現任主席梁君彥解釋，又預料令會議繼續進行嘅話，民主派勢出手阻撓，自己唔想趕泛民離場，所以先唔做代主席。卿姐即刻話，唔想做就唔做，「咁你咪好發達？」坦言自己做主席時都趕過同屬於泛民嘅前議員陳偉業離開會議室啦。
任主席冇得發言「有得唔做就唔做」
卿姐亦翻舊帳，話自己都做過財務委員會主席，「多得你（阿忠）唔喺度，我都選到」，仲提到阿忠喺近日一個法案委員會再做「逃兵」，問佢點解咁唔想做。阿忠苦笑話，做主席要讓畀委員發言，次次想講都冇得講，一再強調有得唔做就唔做喎。卿姐苦口婆心講，呢啲係責任嚟，要理解市民對議員有期望。
隨後卿姐更戲謔「街工到底仲存唔存在？」阿忠堅定咁話「存在」，不過原來九名執委，退到得番三人，會員人數亦由約九十人降至約七十人，預計下月中下旬會召開會員大會選新執委會。被問到街工內部係咪不滿阿忠做法，有「政見不合」，阿忠無正面回應，只係話內部唔滿意佢現時嘅議會表現方式，未能夠配合社會睇法，不過依家剩餘嘅成員都係支持佢嘅，亦否認自己係「一人專政」。
另外，「公屋被迫遷戶關注組」尋日加入狙擊團隊，話阿忠對勞工組嘅去向未有確實說法，而勞工組就一直幫助關注組，為免影響到正常運作，要求阿忠交代關注組有咩安排。
街工咁多年來只得一名立法會議員，區議員只減無增，阿忠執掌街工搞到「唔清唔楚」，好似永遠只想留喺自己嘅安全區。相信不論有再多嘅否認，阿忠似乎好難避免「一人專政」嘅指摘，睇吓內部怨氣幾時會爆煲啫！