政情：中環出更：港鐵內扮哥斯拉 惡搞國歌 派發傳單 眾志涉違例
香港眾志早幾日發起「哥斯拉行動」，三名眾志成員戴上哥斯拉頭套，分別喺港鐵荃灣線車廂內、中環站同埋香港站之間嘅通道內，多次高唱惡搞版國歌，期間仲有其他成員派傳單畀乘客，話希望引起市民關注即將審議嘅《國歌法》。眾志咁做或違《香港鐵路附例》，佢哋仲自己拍埋片喺Facebook直播，如果港鐵追究起上嚟，可謂證據確鑿，都幾難走得甩喇！
直播片段證據確鑿
到底眾志犯咗咩條例呢？首先港鐵附例第三十二（b）條清楚寫明，「除非得到港鐵公司書面特准，否則任何人不得在鐵路處所任何部分派發任何書籍、單張、其他印刷品或任何樣本或其他物品。」派傳單唔得，咁直播同唱歌又得唔得？睇番港鐵附例第廿五、廿六條，分別列明乘客不得造成滋擾，以及禁止演奏樂器、唱歌或跳舞等。雖然未知眾志嘅行為有冇構成滋擾，但唱歌就係不爭嘅事實。
港鐵回覆查詢時就話，唔清楚短片嘅拍攝時間，只呼籲乘客顧己及人，如果有乘客覺得滋擾，可以即時同職員聯絡同跟進。至於會唔會追究眾志，港鐵只係話暫時未有資料喎！唔通港鐵覺得係小事一樁，打算放生？
卓妮