中環出更：陳帆引報道講市建局項目 畀麥美娟KO
立法會尋日召開大會，有立法會議員就香港公私房屋供應問題提出口頭質詢，其中議員胡志偉就問到，政府會唔會通過市區重建局等機構去推行首置上車盤計劃。運輸及房屋局局長陳帆就話市建局係財政獨立，但首置都係有收入嘅，所以都持開放態度，又話有個別報紙有作相關報道。陳帆此話一出就畀身兼市建局非執董嘅議員麥美娟（Alice）KO。Alice即刻話嗰個唔使報紙報道，「我哋（市建局）總裁尋日（前日）已經講咗」。有「鬧交王」之稱嘅Alice，果然名不虛傳。
議員促增公營屋比例
Alice之後又提及，市建局「做得一就做得二」，之前有「煥然一居」，依家又有馬頭圍項目亦會低於市價發售，希望之後會有第三、第四個。佢又追問陳帆，可唔可以增加公私營房屋六比四中嘅公營房屋比例。而議員尹兆堅同郭偉強都有問到同樣問題。
但陳帆都只係話政府團隊研究緊，未有決定，又話依家六四比下，公營房屋要二十八萬個單位，依家只係搵到土地提供二十三萬個，如果提升公私營房屋比例至七比三，目標就會更遠喎。陳帆咁講，咁同嫌個終點太遠，就將個終點搬前啲有乜分別呢？
卓妮