政情：吳良好添孖孫女 開心到眼濕濕
父親節啱啱過去，香港福建社團聯會主席吳良好收到一份令佢眼濕濕嘅禮物，咩禮物咁感動？原來係佢嘅新抱、仁愛堂總理吳鄭慧賢（慧慧）前幾日幫佢添咗一對孫女，加上三名活潑精靈嘅孫仔，吳良好三年幾接連添咗五名孫仔孫女，難怪佢抱住孖B時，開心到眼紅紅啦！
生咗兩日就係父親節
慧慧話，因為佢哋同老爺一齊住，作為爺爺嘅吳良好日日都同孫仔玩，所以好有感情。今次生孖女，老爺連日都有到醫院探佢同BB，咁啱生咗兩日後就係父親節，所以特別有意義。
慧慧老公吳志龍（Chris）形容孖女係最好嘅父親節禮物，佢喺社交平台分享喜訊時好幽默咁話︰「年近三十，六月十五日生產部光榮結業」，唔講仲以為有工廠執笠，其實係三年抱五嘅佢宣布「收工」。佢又話，每次太太生產都會入產房陪伴兼幫BB剪臍帶，今次亦唔例外，五名子女嘅臍帶都係佢剪，已經熟手喎。