中環出更：端午節收太多糉馬僑生轉贈長者
過年過節送禮畀人係一份心意，收禮嘅人有時都會唔好意思拒絕，所以如果人緣太好，收到太多禮，點樣處理都係一個煩惱，如果收到過百隻糉，真係唔知點算好喇。「小巴大王」馬亞木同佢個仔馬僑生尋日出席屯門龍舟競渡。馬僑生講起，佢鍾意食有鹹蛋黃嘅糉，試過一年端午節收到幾百隻糉，但為健康着想，都唔敢食咁多，所以就搵咗啲慈善機構幫手，將啲糉轉贈畀長者。咁樣唔浪費之餘，又可以氹長者開心。
早排天氣熱到令人覺得好難受，唔少人都會去游水消暑。馬僑生話，最近一星期去游三次水，但佢通常都會揀去室內游泳池游水，因為怕戶外如泳灘等地方啲水唔太乾淨喎。
羅台秦細個喺台灣扒龍舟
同場仲有仁愛堂主席羅台秦同老公戴澤良孖公仔咁出現，相當恩愛。講起游水，羅台秦話，佢小學三年級時爸爸已經教識佢游水，好細個喺台灣時仲試過扒龍舟，佢最想就係喺龍舟上做打鼓嗰個，不過一直苦無機會。仁愛堂尋日喺活動中嘅一個龍舟友誼盃攞到亞軍，羅台秦預告七月中會搞水上競技籌款，到時佢將會做總司令，組隊比賽。睇嚟今個暑假佢都有排忙喇。
已故鄉議局前主席劉皇發（發叔）嘅外甥女薛滙文，就同老公大律師謝英權帶埋囡囡出席活動。發叔過去多年嚟出任屯門區議會主席，薛滙文就話，發叔好多年前都做過龍舟會主席添，所以佢細細個已出席屯門龍舟競渡。佢仲話，當年龍舟競渡係喺三聖邨搭竹棚鐵皮舉行，真係又焗又熱，依家轉咗場地，喺屯門河嘅另一邊舉行，亦冇再用竹棚，已經涼快好多咁話。
卓妮