中環出更：夠晒環保 郭振華紙扇撥涼 順便紓緩手指痛
今年夏天特別熱，真係要諗吓方法消暑o架。香港工業總會（工總）名譽會長鄭文聰早前出席香港企業環保領先大獎頒獎暨開展禮時話，夏天打高爾夫球熱到受唔到時，會淋水幫自己降溫。至於工總主席郭振華（Jimmy）就話，用小型電風扇都要用電，其實用紙扇就最降溫，仲可以紓緩手機導致嘅拇指痛楚喎！
出席環保頒獎禮，Jimmy都乘機介紹紙扇呢個環保方法，佢一路講一路搵張紙撥，等卓妮感受吓有幾大風。
鄭文聰打高球淋凍水
鄭文聰就話，天氣熱時會揀早上約七點去跑步，咁就冇咁熱，不過最辛苦都係打高爾夫球，一打四個幾鐘，有時熱到受唔住就會淋水冷卻吓自己，仲會搵毛巾包住啲冰，印吓自己降溫。佢又講起，公司已轉咗容許戶外工作嘅同事着短袖衫，仲會煲涼茶畀員工消暑添！
工總副主席嚴志明都係一個好僱主，佢話多年前喺廠房天台種咗啲植物，好處多多，一來令到廠內冇咁熱，喺頂層工作嘅同事特別覺得涼好多，二來多咗個地方畀員工可以行上去放鬆吓。
講起環保，唔少人都話要開少啲冷氣，香港地球之友主席吳方笑微就非常貼地，佢話香港依家居住環境咁辛苦，好多人屋企都冇對流窗，甚至有啲人屋企個窗口又細，甚至對住鄰居嘅冷氣機背後，唔開冷氣又真係幾難受。佢認為未來應該從根源着手，新市鎮規劃時設計得好啲，咁住喺入面嘅人就自然會開少啲冷氣啦！
卓妮