政情：吳思諾彈青委會 反被揭唔開會
已故立法局議員吳明欽女兒吳思諾，早前被委任為青年發展委員會（青委會）委員。佢尋日出席一個座談會時被問到對青委會嘅睇法，作為委員嘅佢大潑冷水，不過就換來同場另一名青委會委員、荃灣區議員林琳踢爆佢無開會，真係(火羅)喇。
吳思諾形容青委會係密室會議，又話部分委員係富二代，委員間嘅職業背景差異大，而且已經算係成功青年，有自己嘅事業成就，質疑佢哋感受唔到一般年輕人嘅無力感。佢又爆料話青委會首次大會冇乜討論青年政策，直言對青委會可令政策有進展感到絕望，唔使對青委會抱太大期望咁話。
排斥態度加入 林琳憂吳Hea做
喺青年事務委員會過渡至青委會嘅林琳聽完吳嘅說話後，就建議吳多啲參與會議，仲踢爆青委會三個專責小組都唔見吳參與，直言對吳用排斥嘅態度加入青委會覺得驚，擔心吳會Hea做。
吳就即刻解釋咁啱唔喺香港先冇開會，又話委員睇法有分歧，建議政府唔好再閉門會議，應搞直播畀大家一齊評論喎。