政情：憶與亡子長跑 蔡若蓮話人生如馬拉松
教育局副局長蔡若蓮長子去年逝世，其長子生前酷愛運動，兩母子更曾一同報名參加長跑。蔡尋日喺父親節前夕，出席一個推廣講故事嘅活動生命童伴講「古」仔先導計劃公開嘉許禮時，講起以前同長子經常一齊長跑，又話生命就好似一場好長嘅馬拉松咁，而生命只可以活一次。
冀小朋友攀越挑戰成長
蔡若蓮喺活動上致詞時話，馬拉松最艱難嘅地方係要跑好耐，過程中會遇到困難同挑戰，自己及同伴有時會跌倒，馬拉松需要有韌力同唔怕困難，而生命嘅成長同韌力就係來自不斷攀越一啲挑戰，通過困難同苦難，塑造品格，人生就會變得更豐富。
佢又話，喺長跑中有時有同伴，有時就冇，有時遇到難題同伴會幫到你，但有時就幫唔到，閱讀可以令到大家隨時隨地搵到幫到你嘅朋友，甚至喺閱讀時可以將人哋嘅經歷變成生命嘅啟發，希望小朋友可以從中得到鼓勵同力量咁話。