政情：觀塘項目觸礁 陳振彬「噴」醒譚文豪 陸頌雄

叫二人向居民交代

陳振彬批評，觀塘海濱音樂噴泉項目有政治滲入，反對派為反對而反對，譚文豪都要向居民補鑊，因為譚賴當局事前冇就項目諮詢麗港城業主立案法團，「冇諮詢同市民需要係兩件事」。對於譚聲稱噴泉浪費食水，陳批評呢個理由好笑，「佢（譚）都唔知噴水池啲水係循環嘅」，所以今次就項目投反對票嘅議員，將來再參選立法會九龍東選舉，居民一定唔支持。

至於聽聞因為要入院而無法投票嘅陸頌雄，翌日又安然無恙現身立法會，陳就話，留番有關部門同陸傾啦，最重要係議員吸取今次經驗，要覺得立法會係「全神貫注工作嘅地方」。陳又話，冇聽過陸有意落戶立法會九龍東，亦冇詳細問佢點解會「甩轆」冇投票，佢最關注係點同居民交代事件。不過，陳警告，今次冇投票又想參選嘅話，就一定要好好同市民解釋，亦好容易被人攻擊。

雖然項目被工務小組否決，但其實政府仍可以直接將項目提交財務委員會審議。陳話，唔會「夾」政府咁做，因為涉及程序問題，希望政府諗下點樣安排，因為好多市民想立法會休會前可以通過項目。民政事務局局長劉江華尋日出席另一活動時話，局方希望協助區議會落實地區工程，現階段會就項目聽取各方意見，再決定會否繼續向財委會爭取撥款。今次建制派甩轆唔夠人投票搞出個大頭佛，睇嚟都係要政府做醜人硬闖財委會喇！