中環出更:世界盃掀熱潮 黃進達:有利旅遊業

四年一度嘅世界盃正喺俄羅斯上演,又再掀起睇波熱潮,而呢股熱潮就為本港旅遊界同飲食界帶來商機。唔少人計劃遠赴俄羅斯參加呢項體壇盛事,旅遊業議會(旅議會)主席黃進達(Jason)就話,雖然部分人會揀自由行方式去睇波,但參加旅行團去睇波仍然有其優勝之處,就係可以避免語言不通同保安問題喇。

本港旅行社早已開始俄羅斯旅遊嘅推廣,Jason預計就算喺世界盃之後,業界都會因應多項基建落成啟用而調整宣傳方針。佢又話,香港人鍾意體育項目,每逢有體壇盛事都吸引到港人去睇,就算只係亞運等洲際賽事都有捧場客,當中以國家隊同港隊擅長嘅項目最受歡迎。

之前有個香港國際旅遊展喺香港會議展覽中心舉辦,多個旅遊、酒店同餐飲業界相關協會就趁機成立聯盟,以加強旅遊相關行業嘅交流同互通,所以當日都有唔少旅遊業及飲食業界代表出席,商務及經濟發展局副局長陳百里同旅遊界立法會議員姚思榮都有到場。

同場嘅旅議會前總幹事董耀中喺去年十二月卸下該會工作,但就並非專心享受退休生活,事關佢已經轉咗做旅遊事務署顧問,繼續服務業界。佢話自己享受工作嘅感覺,而且業界未來都有唔少事務值得關注,所以就唔肯退休喎。

邱金榮有太太陪睇波

稻苗學會主席邱金榮就自爆係英超球迷,最鍾意係曼聯領隊莫連奴,所以現時上演嘅世界盃都唔會錯過,而太太更會陪佢睇波,真係體貼。不過佢就話,以球迷角度,一大班朋友齊齊睇波先夠開心,所以飲食業界一定可以從直播世界盃中受惠。

卓妮

第一手消息請下載on.cc東網iPhone/iPad/Android/Windows Phone Apps