政情：馮興禮就商界 去馬場傾政策
勞工及福利局近排運程好似唔多好，跨黨派議員都大呻局長羅致光唔同大家「飲咖啡」，而令打工仔引頸以待嘅取消強積金（MPF）對沖方案，更令商界有怨言。
畀大家呻撤MPF對沖怨氣
據了解，為咗「疏導」商界怨氣，勞福局派人從多方面去做游說，甚至派出政治助理馮興禮（Henry）去馬場搵商界議員傾政策。嘩，乜啲商界議員尊貴到要人遷就佢哋去馬場傾呀？
最近幾個星期三，唔少政商界人士都喺馬場見到Henry現身，同場仲有Henry爸爸、立法會前秘書長馮載祥，不過據知，馮載祥同Henry係各有各玩，Henry被上司委派「暗盤」任務，去馬場同商界議員「傾吓偈」，讓大家呻吓取消MPF對沖嘅事。
羅致光不嬲都主張「有咩開會先講」，今鋪應該真係辣着太多火頭，要派出Henry去撲火，不過，講真嗰句，喺馬場講政策似乎唔係太合適，到底點解唔可以喺辦公室坐定定傾呢？