中環出更:蔡淑嫻掃平價衫 邵家臻試貴價波鞋

政商界名人不時都會去中環購物「血拼」,咪以為喺中環呢個商業區,就一定係買貴嘢,卓妮日前就見到創新科技署署長蔡淑嫻喺中環悠閒買衫,仲喺減價減到一百元一件衫嘅平民價服裝店成功覓得戰利品,不過,同日喺中環另一商場睇鞋嘅社會福利界立法會議員邵家臻就失望而回,事關佢睇中咗一對貴價限量版波鞋,可能因為太貴,最終只能夠試咗當買咗喇!

卓妮早前喺中環一個商場遇到蔡淑嫻,當時已經係下午兩點,過咗午飯時間,但佢依然步履悠閒,似乎都唔趕住返辦公室。蔡淑嫻先行落中環港鐵站嘅餅店買咗幾包食品,然後上番皇后大道中,前後入咗兩間時裝店,仲喺其中一間有斬獲。該時裝店並非貴價名店,只係平民店,仲做緊減價,一百蚊就可以有收穫喇。蔡淑嫻拎咗啲衫褲左拼右拼,好快就搵到心頭好後就去停車場攞車。

唔認行街 黑面上車踩油走

當時已經兩點四十五分,卓妮行上前問蔡淑嫻係咪放假嚟中環行吓街。點知佢就話唔係,之後就黑口黑面上車,踩油門絕塵而去喇。唔知係咪因為當日天口(慶),所以想快啲返去涼冷氣呢?卓妮兩日後又再遇到蔡淑嫻,佢身穿牛仔褲同黑色衫去教堂,着得相當隨意,唔知係咪喺同一間平價時裝店買嘅呢?

其實卓妮早前亦遇見邵家臻去睇男裝衫,佢行咗幾個圈就轉睇波鞋,仲坐底試着一對價值七千五百蚊嘅限量版波鞋添。不過,佢最終逗留十分鐘就離開,毫無收穫。邵家臻之後話,該對波鞋連法國人喺當地都搶到頭崩額裂,咁啱呢間舖有客人訂完唔要,佢先有實物可以試穿咋,不過對鞋太貴,佢就唔捨得買嘞。睇嚟佢對呢款限量版波鞋真係依依不捨!

卓妮

第一手消息請下載on.cc東網iPhone/iPad/Android/Windows Phone Apps