政情：遊俄羅斯遇黑的 馮興禮花錢消災
俄羅斯一向被視為「戰鬥民族」，就連練開拳嘅勞工及福利局政治助理馮興禮（Henry）亦認同，事關佢早年仍任職貿易發展局時，曾到俄羅斯首都莫斯科出差，期間誤搭「黑的」被索天價車費。佢想落車時司機竟加速開車，嚇到佢寧願畀錢消災。
Henry話，出發前已知俄羅斯「黑的」問題嚴重，所以喺俄羅斯期間一直以手機程式叫車。去到行程最後一日，佢喺一個收唔到手機信號嘅商場，惟有喺街截的士，結果大約十分鐘返酒店嘅車程，司機竟索價一百美元，比原來嘅車費高出幾倍。
嚇到外遊唔敢街邊截車
Henry諗住已到酒店門口，想落車向職員求助，點知佢一打開車門，隻腳都未掂地，司機即刻踩油開車，嚇到佢縮番入車廂。Henry雖然練開拳擊，但最後都係選擇「投降」，畀錢買個大教訓。自此去外地旅行，尤其有治安風險嘅國家或地區，一定會叫酒店幫手安排接送，唔敢再冒險喺街邊截車啦。