政情：白帶陳穎欣飛踢夠架勢
深水埗區議員陳穎欣平時望落弱質纖纖，不過佢早排上載一張玩跆拳道嘅相，好有架勢咁嚟一招跳躍側踢，成功踢爛塊木板。打拳照一出，隨即吸引唔少人留言。前立法會議員鄧家彪話睇相都感受到其腳風，油尖旺區議員陳兆棠就提醒佢小心嚇親追求者喎。
跆拳道體驗日反應熱烈
至於立法會議員郭偉强就留意到，陳穎欣腰間綁住代表最初級嘅白帶，竟然可以打到咁激。細問之下，其實陳穎欣只係初哥一名，當日趁住喺地區搞跆拳道體驗日，幫手睇住小朋友之餘，再乘機偷師。佢歸功於師父教得好，仲話今次活動喺地區反應熱烈，所以遲啲會恒常化，畀小朋友以考帶為目標咁話。