政情：周庭眾志宣傳品 被指抄「女聲合唱」
香港眾志最近喺社交網站上載多張照片，為佢哋將喺維園六四晚會街站發售嘅Ｔ恤宣傳。其中一張照片就係香港眾志成員周庭，同一班女仔着住佢哋發售嘅其中一款米白色Ｔ恤影嘅造型照，周庭手持白色蠟燭，其他女仔就瞌眼靠埋一齊，都幾有feel（感覺）。不過，有人就發現，佢哋張相同歌唱組合「女聲合唱」嘅宣傳相十分相似，質疑香港眾志抄橋。
動作表情幾乎一樣
講番「女聲合唱」張相，其實係佢哋之前一個表演嘅宣傳照，係一班女成員着住紅色衫影嘅相，相中人數較香港眾志多，不過周庭等人嘅動作同表情就可以話幾乎抄足「女聲合唱」，只係周庭並冇同「女聲合唱」成員一樣，喺雙眼眼底化妝畫上黑點。
網民總係創意無限嘅，好快就有人拎周庭張相改圖，幫周庭「加番兩點」喇。但亦有網民話，周庭兩個眼袋咁大，唔使加咁話。睇嚟周庭都要多多保養至得喇！
