政情：小麗補選搵Plan B 民協反對欽點
因宣誓無效被取消立法會議員資格（DQ）嘅自決派劉小麗，事隔九個月撤銷DQ案上訴，猶如宣布參選第二波九龍西補選。據悉小麗參選都擔心再被DQ，所以曾討論由民協派人做其後補人選（Plan B）嘅可能性，尋日雙方正式會面，民協企硬反對欽點Plan B，堅持要為Plan B搞初選。不過，初選與否都好，據了解民協傾向派新生代出戰，意味老將馮檢基（阿基）難以代表民協出戰，莫非同近日傳佢退黨參選有關？
民主派已認定小麗再參選亦會被DQ，所以一早就Plan B人選爭餐懵。據了解，在小麗仲未正式撤銷DQ上訴前，佢曾經同民協非正式會面，當時討論到民協有無可能派人做其Plan B。會後民協中人認為，如果Plan B當選，雙方仍要討論如何分配呢個立法會議席帶來嘅龐大資源。不過，隨着坊間傳出另一啲Plan B人選，小麗同民協呢個協議已等同拉倒。
定要有初選先會撐
尋日小麗去到民協深水埗總部傾咗差唔多兩小時，民協代表有主席施德來、兩位副主席何啟明及楊彧、老將馮檢基。施德來會後接受查詢話，民協支持小麗出選，但Plan B就「反對有欽點」，一定要有初選，否則民協好難支持。
傾向派新世代參加
民協企硬反對欽點，或多或少同唔希望再見到上一次九龍西補選發生嘅「屈基（逼退馮檢基）」事件有關，不過，咁亦唔代表佢哋會撐阿基喎。據了解，民協內部傾向派出新世代參與初選，其中何啟明及楊彧都係大熱。施德來就話，民協會喺月底商討假如有初選，將會派邊個出戰等，佢又透露民主動力將會喺本月十五日討論Plan B細節。
按照目前形勢，阿基若要出戰新一輪九龍西補選嘅機會可謂微乎其微，早前更傳佢打算退出民協，仲搵埋部分民協舊部另起爐灶。不過，之前阿基都講過冇意參與補選，仲話對於流傳嘅事唔作回應。尋日再問阿基見小麗嘅事，佢就話傳聞實在太多，不作回應；所以一切傳言實在難分真假。