中環出更：熱爆5月 楊孝華憶制水冇得沖涼
近排本港持續酷熱、雨量稀少，香港嘅水塘水位降低，令人擔心制水重臨。前立法會議員楊孝華日前出席一個晚宴活動時都話，五月本應多雨，但今年五月就好似盛夏咁炎熱同乾燥，情況同五十幾年前嘅水荒有啲似。佢又話，過往香港都出現過幾次限制供水，但最嚴重係一九六三年，當時家家戶戶都要準備大批水桶，以迎接四日先有一次嘅限制供水。當時佢為咗慳水，就算成身大汗都只能夠搵條濕毛巾抹身，冇得沖涼。真係聽落都覺得辛苦喇。
而飲食界立法會議員張宇人（Tommy）都經歷過制水嘅歲月，其中一個深刻印象就係母校因為制水而要轉變校服顏色。話說佢母校拔萃男書院夏季校服原本係白衫白褲，但因為限制用水，好難保持校服潔白，學校於是就將白色校服褲改為灰色喇。Tommy都話，今年氣候好特殊，濕漉漉嘅梅雨天氣好似未曾出現，一下子就踏入夏季。佢又話，內地唔少地方都受水荒困擾，港人能夠得到穩定供水實在來之不易，應該好好珍惜咁話。
李應生：內地乾旱唔影響中藥材
內地唔少地方都出現乾旱，咁又會唔會影響到中藥材供港呢？從事中藥材零售同批發嘅中華總商會副會長李應生就話機會極微，因為輸港嘅中藥材來自中國各地，如果某省出現旱情，亦有其他地方出產嘅中藥材可補上。不過李應生就話，佢五月上旬到東江上游視察，發覺水位確係較往常低，惟有寄望雨季來臨喇。
財經事務及庫務局副局長陳浩濂就未經歷過制水苦況，但都明白到「水為財」，如果欠缺充足嘅供水，經濟亦會受到影響。陳浩濂話，東江水唔係佢負責嘅範疇，但佢就覺得東江水源頭距離香港好遠，就算香港持續乾旱，相信供水方面都冇問題喎。
卓妮