政情：故宮要夠潮單霽翔靠館貓吸睛

香港故宮文化博物館啱啱開始動工，預計二○二二年落成，唔知到時吸引到幾多人去參觀呢？北京故宮博物院院長單霽翔尋日以「世界文化格局的故宮博物院」為題進行咗一場演講，佢話博物館都要配合生活潮流。

點先夠潮？佢話例如用電子支付購票減省輪候時間、透過電子提供多種語言嘅講解、VR扮演皇帝傳召大臣對話，咁就有趣得多喇！佢仲話會不時喺社交平台更新故宮博物院嘅情況，例如故宮博物院住咗大概二百隻貓，因為實在太多市民關心貓嘅動向，所以佢決定定期更新貓嘅狀況，咁咪吸引到人嚟睇囉！

唔單止咁，佢仲召集咗一群教授學者幫啲文物「做體檢」，佢話要展出文物前必須做好修復，過往因該科技水平不足，令部分文物例如書法、唐卡等冇乜人敢修復，但依家科技水平愈嚟愈高，所以都係時候「醫」番啲文物喇！