政情：麥美娟寸爆馮興禮做政助隱形
政治助理係協助問責局長聯絡政黨，之但係連電話都冇個，又點溝通呢？新一屆嘅政助上任近一年，然而工聯會嘅立法會議員麥美娟（Alice）話，同佢關注嘅議題最密切嘅有三個政策局，當中民政事務局政助黎穎瑜有多啲聯絡，不時會打吓電話同WhatsApp佢，而發展局政助馮英倫早前WhatsApp過佢，至於勞工及福利局政助呢，喺上個月先首次WhatsApp佢，佢話：「佢姓馮叫乜嘢名，我都唔記得，只係記得佢爸爸個名（立法會前秘書長馮載祥）。」
黎穎瑜同馮英倫喺上屆政府已經做政助，過渡到今屆政府，而勞福局馮興禮喺舊年十月履新，返咗工近八個月，但Alice連佢個名都噏唔出，可見就真係冇乜聯絡，睇嚟馮興禮都要檢討吓嘞！
其實Alice早前喺預算案特別質詢中，向三個局索取過呢三個政治助理嘅詳細職責，要求局方回應佢哋過去同持份者如議員、議員助理聯繫次數等。Alice話當局只係重質量，回覆當然係冇乜實質嘢答到喇，所以各局都話冇為相關工作備存統計數字。
Alice強調唔係針對呢三個政助，又話：「事實上佢哋係比較少接觸我，但係佢哋冇搵我冇所謂，可能搵咗其他人，我只係想知道佢哋有冇聯絡啲持份者，同持份者有冇溝通？呢樣先係最重要。」
馮稱唔好意思 下周拜訪辦事處
老實講，政助月薪逾八萬至十二萬元，一直被質疑人工咁高，但就唔見影，唔知匿埋做啲乜嘢？唔通真係忙到打個電話、見個面都咁難？聽到Alice咁講，啲政助有乜反應呢？
我哋問過馮興禮，佢承認以往較多聯絡工聯會另一名議員陸頌雄，同Alice的確較少接觸，有改善嘅空間，如果令對方有唔開心嘅話，都覺得唔好意思，見到相關報道後已經即時聯絡Alice，希望佢唔好介意，亦已經約咗下星期拜訪佢嘅辦事處，相信日後喺侍產假立法同檢討改善女性產假方面，會有好多機會同Alice合作咁話。