政情：葛珮帆讚好頸鏈 蔣麗芸割愛轉讓
唔少女性都鍾情以小飾物為一身造型點綴，好似立法會議員蔣麗芸（阿Ann）都一樣。不過，佢見議員葛珮帆（EQ）係同好，竟然即刻割愛，讓出全人手製嘅頸鏈，好大方喎！
怕黨友呷醋先冇送
阿Ann日前戴住由台灣花蓮購入嘅頸鏈開會，而EQ見狀隨即大讚得意，阿Ann見到有人賞識，就二話不說將頸鏈轉讓。阿Ann就話條頸鏈人手製造，而且係環保物料，加上今次已經係EQ第二次讚條頸鏈得意，就諗都唔使諗，即刻轉讓畀EQ囉！阿Ann仲話本身想送贈畀EQ，但因黨友眾多，怕其他黨友呷醋，而且自己無咁多頸鏈送出，所以就用轉讓方式畀EQ喇！
EQ之後即時戴上頸鏈，仲話自己一向鍾意會郁嚟郁去嘅小飾物，但佢就完全冇印象已經係第二次讚呢條頸鏈喎，所以佢聽到阿Ann所言都好驚訝！