中環出更：邵家臻挑機 叫羅致光住院舍
社會福利署正檢討《安老院舍條例》，其中喺提升院舍人均面積規定方面惹起爭議，有傳政府擬將現時法定嘅六點五平方米提升至九點五平方米，而立法會社福界議員邵家臻聯同多個團體則堅持「8+8」方案。邵家臻等人尋日更挑機，邀請勞工及福利局局長羅致光入住人均面積九點五平方米嘅院舍一個月，模擬長者、殘疾人士嘅生活處境。
有份出席記者會嘅自決派劉小麗批評羅致光曾形容8+8方案唔太理想係漠視方案嘅細節。佢解釋，8+8方案係指寢室嘅人均面積八平方米，而另外八平方米係其他安老院舍嘅活動地方，如辦公室、藥房、活動空間。佢認為羅致光嘅說法係錯誤類比、陷長者於不義、存心欺瞞公眾。對於政府曾話如果提升人均面積或會引起結業潮，劉小麗解釋，方案係以循序漸進形式推行，唔會有院舍即時結業。
批羅製造恐慌
邵家臻批評羅致光過去喺研究長者住宿服務券可行性時，應了解私營院舍嘅質素問題，因有唔少長者寧願花三至五年時間輪候公營院舍，都唔願意入住私營院舍，而現時有兩成私營院舍仍未住滿，因此冇誘因改善私營院舍嘅質素問題，但羅致光卻製造恐慌，稱提升院舍質素幅度太大，令院舍倒閉，佢質疑震盪有冇咁大。
卓妮