中環出更：舞獅冇麒麟臂 歐陽秀明鼓勵女仔玩
舞獅畀人嘅印象好陽剛，好多時都係一班男人去玩，但其實近年已經愈嚟愈多女仔玩喇！「一代獅王」夏國璋個仔夏德建嘅新抱歐陽秀明，早前出席佛山社團總會（總會）第二屆會董就職典禮時就講起，目前舞獅圈子嘅男女比例大概係七比三，雖然都係男性多，但佢亦都努力嘗試吸引多啲女性玩，話畀人知舞獅嘅女仔都可以好靚，唔一定會有「麒麟臂」，佢作為舞獅教練就係例子啦，你睇佢手臂幾纖瘦！
歐陽秀明話喺七十年代，女仔連摸吓獅頭都係一種禁忌嚟，直到八十年代因為英女王要主持「點睛儀式」，所以就開放畀女性接觸舞獅，亦都係女性參與舞獅嘅起點，到今時今日佢推動舞獅都唔會太傳統，會有啲商業考慮，例如獅子嘅顏色愈嚟愈多，唔止傳統得紅黃白黑。
鄧祐才讚佛山人廚藝佳
總會會長蘇長榮、主席鄧祐才、常務副會長李詠詩同東華三院副主席譚鎮國都在場，講起佛山嘅傳統，鄧祐才就話美食先係重點，佢話佛山人煮嘢食好叻，因為農產品夠多，隨手拎起乜都可以拎嚟煮，仲好好味添！不過香港都有「美食天堂」嘅美譽喎，唔知佢覺得佛山定香港嘅食物好食啲？佢就話香港嘅煮法好多時都係跟人哋，自己嘅特色唔多，所以佢依然覺得佛山技高一籌。
香港佛山工商聯會副會長李豐年唔係佛山人，而係隔籬嘅紹興人，但佢話佛山入面嘅高明區本來都係屬於紹興嘅，後嚟先撥咗過佛山，仲話睇住佛山發展得愈嚟愈大，慨嘆香港唔可以再拒絕同周邊地區合作，如果唔係好難再發展落去，優勢愈嚟愈少喇！
卓妮