近日天氣酷熱，戶外工作當心中暑，而臨近初夏，花王主管明哥都會進行熱壓力、即中暑風險評估，並向其團隊講解如何預防中暑。
明哥：「今日我會同大家講解點樣喺戶外工作時預防中暑。首先，想考大家乜嘢係中暑？」
小文：「中暑又叫熱壓力，係由於體內產生過量熱力未能及時散發，積聚之後令體溫上升，結果中暑。」
明哥：「正確！熱壓力唔及時治理可以致命，而我哋可以利用儀器量度『暑熱壓力』評估熱壓力風險。」
小文：「『暑熱壓力』？乜嚟？」
明哥：「『暑熱壓力』係指唔同環境因素對人體所構成嘅壓力。新陳代謝會令身體不斷產生熱量，呢啲熱量主要透過身體輻射散熱、空氣傳導及出汗等方式散發。特別喺體力勞動時，熱量會加快產生，身體會自然作出調節，接近皮膚表皮嘅血管會擴張同開始流汗，等更多熱量從皮膚表面散發。不過，氣溫愈高，熱量就愈難透過身體直接散發出去，而相對濕度愈高，汗水也較難揮發，體溫會上升，導致中暑。」
明哥：「熱壓力監測儀會分析溫度、相對濕度及風速等環境因素，計算出綜合指標、即『暑熱壓力指數』。僱主就可根據呢個指數、僱員作業休息規律同時間、衣着同個人體質等因素評估僱員嘅暑熱壓力風險，以決定僱員喺戶外工作時應該採取嘅改善措施。措施包括：避免烈日當空下工作，架設臨時上蓋以遮擋陽光直接照射，增加休息時間及次數，提供足夠飲用水或其他補充體力飲料，以補充流汗失去嘅水分及鹽分等。」
職業安全健康局
www.oshc.org.hk