政情：鳳袍利敏貞新動向 下月轉戰旅遊
早前以鳳袍look出席記者會熱爆網絡嘅商務及經濟發展局常任秘書長利敏貞，連商經局局長邱騰華都大讚佢有「Fashion Sense （時裝觸覺）」。利敏貞原本主事通訊及創意產業，政府尋日公布佢嘅新動向，佢下月十二日將會由通訊及創意產業，轉為主理工商及旅遊，唔知呢個調動係咪因為佢嘅鳳袍形象深入民心，推廣香港就啱晒呢？
利敏貞喺舊年八月起，由通訊事務總監升任為商經局常秘（通訊及創意產業），佢擔任通訊事務總監期間，最為人熟悉嘅係處理電視牌照一事，口才了得。升任常秘後，喺今年大年初五，唔知係咪因為新正頭圖個吉利，利敏貞一身鳳袍出席《廣播條例》同《電訊條例》嘅公眾諮詢記者會，引起網民瘋傳，仲有網民誤會佢係被人P圖添！
推廣場合令人期待
着鳳袍咁有膽識，連邱騰華都力撐佢「着衫有亮點，講嘢有重點」。利敏貞下月起將以商經局常秘（工商及旅遊）嘅身份轉戰旅遊，相信日後唔少推廣旅遊嘅場合，都有機會見到佢，真係令人期待！至於商經局常秘（通訊及創意產業）呢個職位，喺下月十二日起，將會由香港駐美國總經濟貿易專員梁卓文接任。