政情：姚松炎揼本搞形象 執極都唔正
立法會補選落幕兩個月，尋日係各參選人向選舉事務處交開支申報嘅最後限期，唔少候選人同潛在候選人都趕尾班車交表。出戰九龍西直選落敗嘅姚松炎，補選過後被唔少人批評「太離地」，落墨於打網戰搞形象，策略捉錯用神累事。由開支申報嚟睇，佢單係個人形象設計已經使咗十二萬元，包括影相、化妝同整頭，可惜搞幾多形象工程都幫唔到佢打入基層市民嘅心呢！
根據開支申報，姚松炎真係幾揼本搞形象，佢搵專業攝影師影相已經要八千八百元，再用三千元整頭同三千元化妝，唔知男士化妝整頭搞乜要咁貴呢？至於整筆開支，佢就花約一百四十三萬元，按佢獲得約十萬票計，每票值十三元六角。佢另獲得約一百二十一萬元捐款，包括公民黨（公文袋）捐二萬五千元現金同服務、民主黨（白鴿黨）捐約七千三百多元嘅服務同借出設備，而公文袋前立法會議員余若薇更以個人名義捐四十萬元現金支持，唔通公文袋真係好想「收服」姚松炎入黨？
之不過，姚松炎扮「旅行青蛙」吸金籌款都有啲作為，一千元以下細筆捐款總數高達五十五萬元，佢另花近十萬元推廣社交媒體貼文。最有趣係有一張單使一百六十八元買佛具用品，而佢喺新年扮過睇相佬，估計就係用嚟買求籤筒做道具。但係扮乜都冇用吖，結果係選舉策略錯誤，大熱倒灶。
袁海文借錢參選有排還
至於火速參選兼退選嘅白鴿黨深水埗區議員袁海文，佢就無咁多捐獻，仲要同白鴿黨借十八萬元參加民主派初選，白鴿黨只將九千多元嘅利息「捐出」當幫忙。佢回覆查詢就話已開始還錢，月供過萬元，要還到一九年十月。即係到區議會換屆都未還完，到時再借錢條數就愈滾愈大嘞！
港島區參選人伍廸希雖則無乜點宣傳，都使咗近四萬元，按獲得二千二百零二票計算，每票值十七元五毫。而喺民主派初選、新界東參選人張秀賢就花約十六萬六千元，獲十三萬六千元捐款，自己仲要畀成三萬元。
曾鬧出僭建醜聞嘅建築界參選人司馬文就花廿五萬七千元，按獲得嘅二千三百四十五票計算，每票約值一百一十元。佢仲請嚟會計界議員梁繼昌、公文袋議員陳淑莊同白鴿黨鄺俊宇幫手拍片宣傳，三人嘅「拍攝費」分別為五百元、五十一元同十元，統統都當捐款捐畀司馬文就算嘞！