中環出更：梁家傑 楊岳橋 唱衰香港 稱美方表示同情
公民黨主席、立法會前議員梁家傑（袋巾傑）早前與該黨現任立法會議員楊岳橋前往美國「唱衰香港」，期間唔止提到國務院發表一國兩制白皮書、「雙學三子」衝擊政府總部東翼前地案、中美貿易戰等，亦都有提及廣深港高鐵一地兩檢爭議。袋巾傑喺接受訪問時，仲引述美國官員話，美方官員佢哋都留意到，一地兩檢安排係中方想將內地法律喺香港實施喎。
袋巾傑同楊岳橋今個月五日至十四日到紐約同華盛頓訪問，期間唔止喺美國傳統基金會同亞洲協會上「唱衰香港」，仲同美國民主黨眾議院領袖佩洛西（Nancy Pelosi）等會面。
赴美大講政策發展
袋巾傑接受訪問時總結今次行程，提到此行講及唔少話題，包括一地兩檢安排、涉及政改嘅人大八三一決定同立法會議員被取消資格等。佢就話美方官員都留意到一地兩檢安排係中方想將內地法律喺香港實施。而佢都有同美方表明，內地近年嘅打壓力度愈來愈大，不過香港仲有好多人不忘初心，基本上法治仍然良好。提到中美貿易戰，佢就認為「冇理由郁埋香港」，又話美方都表示同情同理解。佢哋最後一日嘅行程就係去人權基金會，同當地傳媒編輯會面，之後就結束佢哋唱衰香港之旅喇！
卓妮