中環出更：文化中心潮推國學 彭嘉恆盼吸引年輕人
講起文化中心，你嘅印象係點？好悶？南懷瑾文教基金會總幹事彭嘉恆最近聯同一群國學大師南懷瑾嘅弟子同支持者，希望成立南懷瑾國際文化中心，傳揚南懷瑾嘅智慧。不過唔好聽到文化中心就以為係同博物館差唔多，因為一班搞手都希望可以接觸多啲年輕人，所以會嘗試加入多啲科技元素，例如透過VR（虛擬實境）去講歷史，仲設有咖啡廳，搵人講解吓南懷瑾嘅思想等等，估唔到文化中心都可以咁潮喎。
彭嘉恆話以前南懷瑾經常宴請朋友，佢後來先明白食飯嘅重點係人與人之間嘅溝通，亦都係一種較為輕鬆嘅教學方式，所以希望透過同樣嘅方式推廣有關文化。雖然文化中心有咗框架，但距離正式成立都要花一段時間，佢哋嚟緊會睇吓可唔可以參與政府嘅活化歷史建築夥伴計劃，選址中環堅尼地道42A號做文化中心。
許曉暉話有幸受南懷瑾啟迪
南懷瑾國際文化中心青年組組長彭子端係南懷瑾最年輕嘅弟子，佢受父母影響，三歲開始接觸南懷瑾嘅書籍，當時梗係睇唔明啦，所以真正開始睇係讀書後期、初初踏入社會期間，一睇就覺得獲益良多，佢話自己以前比較驕傲，但睇南懷瑾嘅書後就收斂同踏實咗咁話。
民政事務局前副局長許曉暉話冇彭子端咁好彩，可以喺濃厚嘅文化氛圍中長大，佢最初接觸南懷瑾係中學嘅時候，都陪佢走過咗漫長嘅成長階段o架！仲話受到南懷瑾嘅智慧啟迪，影響唔少，直言好開心認識到呢位「神交朋友」添！
港大醫學院院長梁卓偉話精通儒釋道，同時能與西方文化接軌，仲要將呢啲智慧寫成書嘅人唔多，應該有一間中心可以加強學習氛圍，等多啲人學習有關修養，畢竟香港係中西文化薈萃嘅哋方，係應該推崇吓匯集中西文化嘅人物。
卓妮